Ó­víst hvort bar­daginn milli Fury og Joshua fari fram

Bæði Anthony Joshua og Tyson Fury eru fyrrum heimsmeistarar í hnefaleikum og báðir eru þeir breskir. Þeir hafa þó aldrei barist á móti hvor öðrum og hefur verið mikil eftirvænting eftir bardaga þeirra á milli.

Báðir bardagakapparnir eiga að berjast í vikunni. Fury berst við Mariusz Wach í Taílandi á föstudaginn og Joshua á að berjast gegn Kristian Prenga í Sádí-Arabíu á laugardaginn.

Búið er að skrifa undir samning sem segir að þeir eigi að berjast hvor við annan í nóvember á þessu ári en nú virðist ekkert vera úr þeim bardaga. Ekki var búið að tilkynna nákvæma dagsetningu né hvar bardaginn átti að vera en líklegast hefði hann verið í Englandi þar sem þeir eru báðir þaðan.

Í viðtali við Sky Sports sagði Fury að hann hefði ekki áhuga á Joshua eða vinum hans. Honum væri sama ef hann sæi hann aldrei aftur. Hann segist vilja ná öðrum bardaga fyrir lok árs og er alveg sama hvort bardaginn sé gegn Joshua eða einhverjum öðrum.

Joshua segist þó vera klár í að mæta Fury í nóvember en hann þurfi bara að vinna bardagann á laugardaginn fyrst. Ef Joshua vinnur bardagann á laugardaginn hefur hann staðið við sinn hluta samningsins og er þá klár að mæta Fury ef hann sjálfur er klár í það.