Leik­vangur með gagn­sætt þak og yfir tuttugu þúsund bíla­stæði

Nýi leikvangurinn verður lokaður en þakið verður úr gleri og því gegnsætt. Hann mun því geta hýst Super Bowl leiki í framtiðinni en það getur verið kalt á þessum slóðum á þeim tíma.

„Frá upphafi hefur markmið okkar verið að skapa eitthvað sem bætir leikupplifun hvers einasta stuðningsmanns. Þessi nýi leikvangur mun gera nákvæmlega það. Hann er stórbrotinn. Hann heiðrar ríka arfleifð klúbbsins um leið og hann markar djarfa stefnu fyrir framtíð Chiefs,“ sagði eigandinn Clark Hunt í yfirlýsingu.

Áform um að byggja nýjan leikvang voru kynnt þegar í desember. Mikilvægur þáttur fyrir félagið með nýja heimavöllinn er að hafa risastórt bílastæði í kringum leikvanginn fyrir stuðningsmenn til að hittast fyrir leiki. Bílastæðið mun þannig rúma tuttugu þúsund bíla.

„Þótt við séum enn að ganga frá mörgum smáatriðum eru nokkur atriði sem við vitum fyrir víst: leikvangurinn mun rúma sjötíu þúsund áhorfendur, hann verður áfram besti staður í heimi fyrir „tailgating“ fyrir leik og öll byggingin verður hönnuð til að skapa hámarks hljóðbærni,“ sagði Hunt.

Töluvert af stuðningsmönnum eru vonsviknir yfir því að yfirgefa eigi hinn goðsagnakennda Arrowhead-leikvang þar sem liðið hefur spilað síðan 1972. Áætlunin er að Chiefs haldi áfram að spila þar til 2030 áður en þeir flytja inn á nýja leikvanginn árið 2031.

Arrowhead er í Missouri-fylki en nýi leikvangurinn verður í Kansas. Kansas City stendur á fylkismörkunum.

Chiefs hafa notið mikillar velgengni á Arrowhead undanfarin ár með sigrum í Super Bowl árin 2020, 2023 og 2024.