Varði Ís­lands­meistara­titilinn en náði ekki að bæta metið

Guðrún Karítas Hallgrímsdóttir er Íslandsmethafi í sleggjukasti kvenna og náði að verja Íslandsmeistaratitilinn sinn nú í dag. Hún náði ekki að bæta Íslandsmetið í dag en það er mikil samkeppni um að bæta það.

Elísabet Rut Rúnarsdóttir er mikill keppinautur Guðrúnar Karítasar og hafa þær í vetur verið að skiptast á að bæta Íslandsmetið í sleggjukasti. Núverandi Íslandsmet á Guðrún Karítas en hún kastaði sleggjunni 73,88 metra. Besti árangur Elísabetar Rutar er 73,19 metrar þannig að ekki er mikið milli þeirra.

Á hundraðasta Meistaramóti Íslands sem er í gangi núna var besta kastið hjá bæði Guðrúnu Karítas og Elísabetu Rut fyrsta kastið þeirra. Guðrún Karítas kastaði 70,09 metra í fyrsta kasti á meðan Elísabet Rut kastaði 67,75 metra. Hvorug þeirra náði að bæta sig í hinum fimm köstunum.

Guðrún Karítas er búin að tryggja sig á Evrópumótið í frjálsum íþróttum sem fer fram um miðjan ágúst í Birmingham í Englandi.

RÚV hefur farið vel yfir baráttu Guðrúnar og Elísabetar um Íslandsmetið og hvað þær hafa báðar staðið sig vel.