Körfubolti

Stelpurnar rúlluðu yfir Hollendinga

Ingvi Þór Sæmundsson skrifar
Ísland hefur unnið tvo leiki í röð í B-deild EM U-18 ára kvenna í körfubolta og er í góðri stöðu til að komast í átta liða úrslit. 
Ísland hefur unnið tvo leiki í röð í B-deild EM U-18 ára kvenna í körfubolta og er í góðri stöðu til að komast í átta liða úrslit.  kkí

Íslenska kvennalandsliðið í körfubolta skipað leikmönnum átján ára og yngri vann afar sannfærandi sigur á Hollandi, 85-62, í þriðja leik sínum í A-riðli B-deildar Evrópumótsins í dag.

Ísland hefur unnið tvo af þremur leikjum sínum í A-riðlinum og mætir Aserbaísjan í lokaleik sínum á morgun. Með sigrinum í dag komust Íslendingar upp í 2. sæti riðilsins.

Ísland er með fimm stig líkt og Portúgal en Íslendingar unnu leik liðanna um helgina. Heimalið Rúmeníu er svo með fjögur stig og Holland og Aserbaísjan þrjú hvort lið. Tvö efstu lið riðilsins komast í átta liða úrslit.

Íslendingar leiddu allan tímann í leiknum í dag og voru komnir með sautján stiga forskot í hálfleik, 41-24.

Hollendingum voru mislagðar hendur í leiknum og töpuðu boltanum 49 sinnum. Íslendingar nýttu sér það til að skora 51 stig. Engu breytti þótt Holland tæki þrettán fráköstum meira en Ísland.

Rebekka Rut Steingrímsdóttir skoraði nítján stig fyrir Ísland, tók sex fráköst, gaf fjórar stoðsendingar og stal boltanum fimm sinnum. Líkt og gegn Portúgal hitti hún illa utan af velli en skoraði tólf stig af vítalínunni.

Hulda María Agnarsdóttir skoraði átján stig, tók fimm fráköst og stal boltanum níu sinnum. Þórey Tea Þorleifsdóttir skoraði ellefu stig en alls komust ellefu af tólf leikmönnum Íslands á blað í leiknum í dag.

Landslið kvenna í körfubolta

Mest lesið


Fleiri fréttir

Sjá meira


×

Mest lesið