Kallar eftir nafla­skoðun í norskum hand­bolta: „Bilið í fremstu þjóðir hefur aukist“

Dalgaard-Hansen skrifaði pistil á heimasíðu norska handknattleikssambandsins eftir að U-19 ára landsliði karla tókst ekki að tryggja sér sæti á HM á næsta ári.

Dalgaard-Hansen segir að þjálfarateymi U-19 ára liðsins hafi fengið leyfi til að beita öllum þeim taktísku úrræðum sem í boði voru til að tryggja HM-sætið. 

„Áður höfum við, til að leggja enn meiri áherslu á einstaklingshæfni leikmanna og þróun leikmanna, sem spila á báðum endum vallarins, valið að nota ekki varnar-/sóknarskiptingar og sjö á sex leik svona snemma í þroskaferlinu,“ skrifar Dalgaard-Hansen.

Hann segir að leikir U-19 ára liðsins síðasta eina og hálfa árið hafi sýnt að beita hefði þurft öllum þeim ráðum sem í boði voru til að komast inn á HM og skerpa áherslurnar í árganginum meira en æskilegt þyki.

„Samt var það ekki nóg. Þrátt fyrir að leikmenn, þjálfarar og stjórnendur hafi gert allt sem í þeirra valdi stóð, verðum við að viðurkenna að við verðum ekki með á HM næsta sumar,“ skrifar Dalgaard-Hansen.

Hann bætir við að Norðmenn verði að líta í eigin barm og athuga hvað þeir geti gert til að missa ekki enn fleiri þjóðir fram úr sér.

„Við verðum að viðurkenna að bilið í fremstu þjóðirnar hefur aukist. Á sama tíma eru fleiri lönd, í raun hópur landa sem áður voru á eftir okkur, sem hafa náð okkur eða farið fram úr okkur,“ skrifar Dalgaard-Hansen og bætir við að fjöldi iðkenda og fjöldi æfinga sé ekki vandamálið.

„Æfa leikmennirnir í hinum löndunum meira en við? Nei, í nokkrum tilfellum æfa þeir í raun minna. Eru fleiri leikmenn í hinum löndunum en hjá okkur? Nei, það á aðeins við um Þýskaland og Frakkland. Við höfum jafn marga leikmenn og Danmörk,“ skrifar Dalgaard-Hansen.

„Við verðum því að skoða þróunarkerfið okkar nánar. Við verðum að skoða daglegan veruleika leikmannanna, þjálfunina og leikjaframboðið sem þeir fá. Saman verðum við að auka gæðin.“