Mynd af sverði birt um hálf­tíma fyrir morðið

Þetta kemur fram á fjölda mismunandi staðarmiðla í Svíþjóð en í umfjöllun SVT Nyheder segir að ekki hafi tekist að bendla aðganginn með óyggjandi hætti við hinn átján ára gamla Liam Nebel, sem nú situr í gæsluvarðhaldi grunaður um morð og morðtilraun.

Nýr og nýr aðgangur

Það sé þó staðfest að aðgangurinn hafi verið virkur í TCC, sem er skammstöfun á True Crime Community, en það er sem fyrr segir undirmenning sem snýst um dýrkun á fjöldamorðingjum og þeim sem gera skólaárásir.

Áður en aðganginum var lokað á föstudag hafi hann verið með ríflega þrjú þúsund og sjö hundruð fylgjendur, yfir hálfa milljón áhorfa á myndbönd og um fimmtíu þúsund „like“.

Þar höfðu verið birt 17 svokölluð „edit“ – stutt myndskeið, aðallega gervigreindarmyndbönd sem sýna ofbeldismenn dansa. Fjórum aðgöngum með svipuðum notendanöfnum hafði verið eytt frá því í upphafi maímánaðar.

Gera lítið úr morðinu

Eftir árásina hafi aðrir TCC-notendur hafist handa við að birta sín eigin myndbönd sem eiga að sýna gerandann, þar sem hann sést dansa á meðan talan -1 birtist, sem er vísun í morðið á 17 ára stúlkunni sem lést í árásinni.

Í straumi eins aðgangsins skrifa notendur athugasemdir eins og „til hamingju maður“ og í athugasemdakerfi Tiktok lýsa sumir yfir undrun.

„Ég er í sjokki yfir því að hann hafi látið af því verða að framkvæma árásina,“ skrifar einn TikTok-notandi en aðrir gera grín að eiganda aðgangsins. „Hann fékk bara -1.“