„Ég vona að ég þurfi ekki að dekka hann“

Andri Broddason skrifar 28. ágúst 2026 12:47

Elvar Már Friðriksson mun leika í Litáen með Neptunas Klaipeda í vetur. Getty/Jón Gautur

Íslenska karlalandsliðið í körfubolta á tvo leiki í undankeppni heimsmeistaramótsins sem fer fram í Katar árið 2027. Elvar Már Friðriksson er einn lykilmaður íslenska landsliðsins og er spenntur fyrir komandi leikjum.

„Það er gott að koma hingað eftir sumarfrí og hlaupa sumarið af sér. Það er fínt að fá þennan glugga áður en allir fara til sinna félagsliða.“

Íslenska liðið mætir bæði Serbíu og Tyrklandi í glugganum en bæði liðin eru gríðarlega sterk.

„Þetta eru tvö af bestu landsliðum í heimi sem við erum að fara að mæta, þannig þetta verður erfitt verkefni. Það verður gaman að máta sig við þá bestu.“

Nikola Jokic leikur fyrir serbneska landsliðið og er búinn að vera einn besti leikmaður NBA-deildarinnar síðustu ár. Hann leikur fyrir Denver Nuggets og varð NBA-meistari árið 2023 og var sama ár valinn mikilvægasti leikmaður úrslitakeppninnar.

„Við erum að fara að spila á móti líklega besta körfuboltamanni í heimi í næsta leik. Það verður verðugt verkefni og ég vona að ég þurfi ekki að dekka hann.“

Mun leika í Litáen eftir Tenerife ævintýrið

Í sumar gekk Elvar Már til liðs við Neptūnas Klaipėda í Litáen en þetta er þriðja félagið sem Elvar leikur fyrir í landinu.

„Ég þekki vel til þarna og er með ágætis tengsl í landinu. Liðið er í góðri Evrópukeppni og gerði vel í fyrra í deildinni. Mér fannst þetta spennandi verkefni og fæ að leika gott hlutverk í liðinu. Ég er bara mjög spenntur að fara aftur til Litáen.“

Í vor var Elvar Már fenginn til liðs við La Laguna Tenerifa í spænsku úrvalsdeildinni í körfubolta. Liðið var í úrslitakeppninni en tveir leikstjórnendanna meiddust og þurfti liðið leikmann í staðinn.

„Þetta var skemmtileg upplifun en það er aldrei þægilegt að koma inn í lið síðasta mánuðinn á tímabilinu. Þeir eru búnir að mynda sín tengsl í liðinu og þú ert að reyna að koma sem utanaðkomandi í liðið og hjálpa til án þess að riðla hlutunum.“

Vill troðfylla höllina gegn Tyrkjum

Á mánudaginn mætir Ísland Tyrklandi í Laugardalshöllinni og vonast Elvar Már eftir miklum stuðningi. Tyrkland er taplaust í undankeppninni í ár en Ísland vann Tyrkland í febrúar á síðasta ári.

„Það er alltaf skemmtilegt að spila fyrir framan fulla höll þannig að ég vona að við fáum góða mætingu og alvöru stemningu.“

Landslið karla í körfubolta HM 2027 í körfubolta