Norris langar ekki að vinna með öðrum liðum og fram­lengir við McLaren

Ríkjandi heimsmeistari í Formúlu 1, Lando Norris, mun halda áfram að vera ökumaður McLaren-liðsins. Hann hefur keyrt með liðinu allan sinn feril eða síðan hann byrjaði í Formúlu 1 árið 2019.

Í viðtali við BBC Sport sagði Norris að það hefði verið áhugi frá öðrum liðum en hann hefði ekki viljað fara neitt annað.

„Ég vil ekki vera með öðru liði. Ég vil ekki eyða tíma með öðru fólki. Þetta var örugglega ein af léttustu ákvörðunum sem ég hef tekið síðan ég byrjaði í Formúlu 1.“

Fyrri samningur hans við McLaren gilti út árið 2027 svo hann var ekki að drífa sig í að skrifa undir annan samning. Hann fann þó að þessi tímapunktur hafi verið góður til að taka ákvörðun um framtíðina.

Norris hefur unnið náið með framkvæmdastjóra McLaren, Zak Brown, og liðsstjóranum Andrea Stella. Sambandið við þá hafði mikil áhrif á ástæðuna fyrir því að hann vildi halda áfram hjá McLaren.

Liðið hefur verið heimsmeistari bílasmiða síðustu tvö ár og var Norris heimsmeistari ökuþóra á síðasta ári. Gengi McLaren hefur ekki verið alveg jafn gott í ár en frammistaða liðsins er að batna. Lando Norris hefur unnið tvo síðustu kappakstra og ef það gengi heldur áfram gæti hann blandað sér í baráttuna um heimsmeistaratitilinn.