Slær Aron marka­metið í kvöld?

KR mætir Víkingi í stærsta leik tímabilsins í kvöld. Gríðarmikilvægt er fyrir KR að vinna leikinn til að halda spennu í titilbaráttunni en Víkingar munu að sama skapi gera gott sem út um hana og fara langt með að tryggja sér Íslandsmeistaratitilinn með sigri.

Í liði KR er markahæsti leikmaður deildarinnar, Aron Sigurðarson, sem skoraði þrennu gegn KA í síðasta leik. Hann er því kominn með 20 mörk í 20 leikjum í deildinni í sumar, auk þess sem hann hefur lagt upp sjö.

Skori Aron eitt mark í kvöld mun hann jafna markamet annars KR-ings, Benónýs Breka Andréssonar, sem skoraði flest mörk allra á einu og sama tímabilinu þegar hann skoraði 21 mark fyrir KR sumarið 2024.

Það met hafði lengi vel staðið í 19 mörkum og þá þarf að taka inn í myndina að leikjum hefur fjölgað í efstu deild, fyrst úr 18 leikjum í 22 en þeir eru 27 talsins í dag.

Fari svo að Aron skori fleiri en eitt mark í dag mun hann bæta markametið. Hann hefur lýst því ítrekað yfir að markmið hans sé að bæta metið og skora jafnvel heil 30 mörk í sumar.

KR og Víkingur mætast klukkan 17:30 að Meistaravöllum í dag. Leikurinn er sýndur beint á Sýn Sport Ísland.