Selenskí kíkti á klakann

„Við áttum upplýsandi og einlægt samtal um stöðu mála og ég undirstrikaði staðfastan stuðning Íslands við varnarbaráttu Úkraínu gegn landvinningastríði Rússlands,“ er haft eftir Þorgerði Katrínu í tilkynningu frá Utanríkisráðuneytinu.

„Við hlustum á óskir Úkraínu um stuðning og íslensk stjórnvöld munu halda ótrauð áfram að veita þeim nauðsynlegan varnar-, efnahags – og mannúðarstuðning, einkum sem lýtur að loftvörnum og á sviði orkumála enda horfir úkraínska þjóðin því miður fram á harðan vetur.“

Í tilkynningunni segir einnig að Denys Shmyhal, orkumálaráðherra Úkraínu, og Rustem Umerov, yfirmaður Leyniþjónustu Úkraínu, hafi einnig verið á fundinum. Hann sótti einnig Oleksiy Gavrysh, sendiherra Úkraínu gagnvart Noregi og Íslandi.

Sjá einnig: Spjallað í Reykja­vík á meðan drónarnir dynja á Kænu­garði

Forsetinn úkraínski kom hingað til lands eftir að hann og teymi hans voru í Noregi þar sem Selenskí sótti jarðarför Haralds Noregskonungs.

Selenskí birti upp úr klukkan átta stutt myndband af komunni til Íslands. Með því skrifar hann að hann hafi komið við hér á leiðinni til Kanada og segist hafa rætt undirbúning Úkraínumanna fyrir komandi vetur við Þorgerði Katrínu.

Þá segir Selenskí að þau hafi talað um varnir úkraínskra orkuvera og loftvarnir Úkraínu. Undanfarin ár hafa Rússar gert ítrekaðar árásir á orkuinnviði og vatnsveitur í Úkraínu á veturna. Þessi vetur verður líklega ekki undantekning.

Forsetinn segir að aðstoð Íslands hafi skilað árangri og að Úkraínumenn séu þakklátir fyrir hana.

Flugvélin „næstum því“ fyrir dróna

Selenskí flaug frá Moldóvu til Óslóar, en enginn flýgur frá Úkraínu um þessar mundir. Úkraínskir fjölmiðlar sögðu frá því í dag að um það leyti þegar flugvél forsetans var flogið af stað hafi rússneskum sjálfsprengidróna verið flogið inn í lofthelgi Moldóvu.

Brottförinn tafðist vegna drónans en NRK hefur eftir Jonas Gahr Støre, forsætisráðherra Noregs, að dróninn hafi næstu því hæft flugvél Selenskís.

Tveir létu lífið þegar annar dróni hæfði landamærastöð milli Úkraínu og Moldóvu í gærkvöldi.

Fréttin hefur verið uppfærð.