Hekla Aurora skorin niður í minjagripi

Kristján Már Unnarsson skrifar 10. september 2026 10:50

Starfsmaður Aviationtag sker bút úr Heklu Aurora. Aviatontag

Norðurljósaflugvélin Hekla Aurora fór ekki öll í bræðslupotta. Þýskt félag, Aviationtag, með aðsetur í Köln, fékk við niðurrif hennar að klippa búta úr skrokknum til að smíða úr þeim minjagripi í samstarfi við Icelandair.

„Boeing 757-þotan lauk þjónustu sinni haustið 2025 en núna fær hluti af upprunalega skrokknum nýtt líf í takmörkuðu upplagi, hannað í samstarfi við Icelandair,“ segir í kynningu Aviationtag.

Norðurljósaflugvélin í júlímánuði í sumar þegar verið var að skera búta úr skrokknum.Aviatontag

Hekla Aurora var þann 12. október í fyrra kvödd með sérstöku kveðjuflugi frá Reykjavíkurflugvelli. Um 140 flugnördar, þar af um 70 útlendingar, keyptu sér far með þotunni sem yfirflugfreyjan um borð sagði farþegum í hátalakerfi að væri fallegasta flugvél í heimi.

Verkið var unnið á á Lleida–Alguaire flugvelli á Spáni.Aviationtag

Þota var rifin á Lleida–Alguaire flugvelli á Spáni en hann er um 150 kílómetra norðvestan Barcelona. Starfsmenn Aviationtag voru þar júlímánuði í sumar að skera búta úr álskrokknum sem enn hélt norðurljósaútlitinu. Úr þeim hafa þeir unnið flugmerkispjöld sem hengja má á töskur eða nota sem lyklakippur.

Merkispjöldin sem búið er að gera úr Boeing 757-þotunni Heklu Aurora.Aviationtag

Minjagripirnir koma í mismunandi litum eftir því hvaðan þeir voru skornir af skrokknum.Aviationtag

Flugvélin var upphaflega smíðuð fyrri spænska flugfélagið Iberia og flaug fyrst í apríl 1994. Icelandair eignaðist hana tíu árum síðar, árið 2004. Norðurljósaútlitið fékk hún þó ekki fyrr en árið 2014 en þá var hún endurmáluð hjá fyrirtæki í Norwich á Englandi.

Í lýsingu segir að málararnir hafi unnið út frá ljósmyndum og endurskapað norðurljósin á skrokknum með því að nota flóknar tækni í málningasprautun. Þeir hafi parað vandlega saman flæðandi liti og bætt við íslensku vetrarlandslagi fyrir neðan. Grænir, tyrkisbláir, bláir og djúpir miðnæturtónar hafi blandast saman. Í farþegarýmið hafi verið sett sérsniðið LED-lýsingarkerfi með norðurljósaupplifun.

Hér má sjá frétt frá kveðjufluginu frá Reykjavíkurflugvelli síðastliðið haust:

Icelandair Boeing Flug Reykjavíkurflugvöllur

Tengdar fréttir

Fegursta flugvél Íslands rifin

Niðurrif Boeing 757-þotunnar Heklu Auroru, eða Norðurljósaþotunnar, er hafið. Flugáhugamenn sögðu margir þotuna eina fegurstu flugvél heims en hún flaug sitt síðasta flug í október síðastliðnum.

3. september 2026 18:45

Flugnördar heims kveðja fegurstu flugvél Íslands

Það er fullyrt að hún sé fegursta flugvél í heimi. Og hún er heimsfræg meðal flugnörda, sem flykktust til Íslands úr öllum heimshornum til að kveðja hana í dag.

12. október 2025 22:12

Mest lesið

Fleiri fréttir