Ný stjarna fæðist í Heið­mörk um helgina

Keppnin verður í beinni útsendingu á Vísi og sjónvarpsstöðinni Vísi, sem má nálgast í öllum myndlyklum. Keppnin hefst klukkan 9:00 á laugardagsmorgun.

Garpur I. Elísabetarson og Tinna Miljevic, sem munu lýsa keppninni, fengu Egil Trausta Ómarsson í spjall í hlaðvarpi Vísis þar sem þau ræddu meðal annars keppnina um helgina.

Horfa má á þáttinn hér  fyrir neðan.

Bakgarðshlaupið fer þannig fram að keppendur hlaupa 6,7 kílómetra hring á hverjum klukkutíma. Þeir sem klára hringinn innan klukkustundar fá að halda áfram og er hlaupið endurtekið þar til aðeins einn keppandi stendur eftir.

Bakgarðshlaupið er haldið tvisvar á ári, í Heiðmörk og í Öskjuhlíð. Keppnin hefur notið gríðarlegra vinsælda á Vísi síðustu ár.

Ólíkt mörgum fyrri hlaupum er erfitt að benda á augljósan sigurvegara fyrir fram. Margir af reynslumestu bakgarðshlaupurum landsins hafa gefið það út að þeir ætli ekki að hlaupa til sigurs enda stór keppni í næsta mánuði. 

„Það er enginn sem hefur unnið Bakgarðinn áður sem er að fara að hlaupa til sigurs,“ segir Egill Trausti meðal annars í þættinum og bendir á að það geti gefið öðrum keppendum aukið sjálfstraust.

Um tuttugu keppendur hafa þegar gefið það út að þeir ætli sér að hlaupa í sólarhring eða lengur. Ef keppendur hlaupa í tuttugu og fjóra klukkutíma ná þeir rúmlega 160 kílómetrum.

Garpur, Tinna og Egill eru sammála um að óvissan um helgina gæti gert keppnina sérstaklega skemmtilega.

Hlusta má á þáttinn líka í öllum helstu hlaðvarpsveitum.

Ástæðan fyrir því er að í fyrri hlaupum hefur oft verið hægt að benda á nokkra reynslumikla hlaupara sem líklega myndu berjast um sigurinn. Nú sé staðan önnur. „Ég held að það geti allt gerst,“ segir Egill.

Þótt margir af sterkustu bakgarðshlaupurum landsins ætli sér ekki endilega að berjast um sigur um helgina verður stór hluti íslenska landsliðsins á svæðinu.

Framundan er heimsmeistarakeppni bakgarðshlaupa í október og er gert ráð fyrir að flestir landsliðsmennirnir mæti í Heiðmörk og nýti helgina sem æfingu fyrir það verkefni.

Sú keppni verður einnig í beinni útsendingu á Vísi.

Bakgarðshlaupið um helgina hefst, eins og áður segir, á laugardagsmorgun klukkan 9 og verður í þráðbeinni útsendingu á Vísi og sjónvarpsstöðinni Vísi allan sólarhringinn, eða þar til síðasti keppandi hefur lokið leik.