Kristersson sagði af sér eftir að öll at­kvæði voru talin

Engar breytingar urðu á þingstyrk fylkinganna þegar lokið var við að teljast síðustu atkvæðin eftir þingkosningarnar á sunnudag um klukkan 13:15 að staðartíma í dag. 

Alls fengu stjórnarandstöðuflokkarnir fjórir 176 þingsæti gegn 173 sætum stjórnarflokkanna. Aðeins munaði 50.539 atkvæðum á fylkingunum.

Jafnaðarmannaflokkur Magdalenu Andersson hlaut flest atkvæði, 28 prósent en Moderatarna, flokkur Ulfs Kristersson forsætisráðherra, 19,8 prósent.

Kristersson stýrði minnihlutastjórn Moderatarna, Kristilegra demókrata og Frjálslynda flokksins sem Svíþjóðardemókratar vörðu falli. Stjórnarflokkarnir þrír bættu við sig mönnum en Svíþjóðardemókratar töpuðu ellefu þingmönnum.

Kristersson lagði fram afsagnarbréf sitt til forseta þingsins eftir að niðurstaðan varð ljós í dag. Í samfélagsmiðlafærslu sagði hann það nú í höndum þingforsetans að taka næstu skref að myndun nýrrar ríkisstjórnar.

Búist er við að stjórnarmyndun verði flókin og að Miðflokkurinn verði í oddstöðu.

Þá hefur Jimmie Åkesson, leiðtogi Svíþjóðardemókrata, sagst ætla að taka sér hlé sem flokksleiðtogi ef hann verður í stjórnarandstöðu. Það gerði hann einnig eftir þingkosningar árið 2014.

Leiðtogar stjórnmálaflokkanna

Amanda Lind

Talsmaður Græningja.

Daniel Helldén

Talsmaður Græningja.

Ebba Busch

Formaður Kristilegra demókrata og orku- og iðnaðarráðherra.

Elisabeth Thand Ringqvist

Formaður Miðflokksins.

Jimmie Åkesson

Formaður Svíþjóðardemókrata.

Magdalena Andersson

Formaður Sósíaldemókrata.

Nooshi Dadgostar

Formaður Vinstriflokksins.

Simona Mohamsson

Formaður Frjálslynda flokksins og menntamálaráðherra.

Ulf Kristersson

Formaður Moderaterna og forsætisráðherra.

Fréttin verður uppfærð.