Banda­ríkin hafi samið við Dan­mörku um Græn­land

Í færslunni sem hann birti á miðlinum Truth Social segist hann hafa náð að vinna með ráðamönnum í Danmörku til að tryggja að Bandaríkin muni að eilífu hafa fulla getu til að gera það sem nauðsynlegt sé á Grænlandi til að tryggja öryggi Grænlands og Bandaríkjanna.

Ekki eftir neinu að bíða

„Þar að auki getur enginn andstæðingur Bandaríkjanna héðan í frá nokkurn tíma haft herstöð á Grænlandi,“ skrifar hann einnig í færslunni. Samningurinn uppfylli að fullu öll þau áhyggjuefni sem Bandaríkjamenn hafi haft í tengslum við málið.

„Við munum þegar í stað hefja ferlið við að koma á fót mikilli hernaðarviðveru á viðkomandi svæði á Grænlandi, þar sem mörg hentug svæði eru. Við munum vinna með íbúum Grænlands að þróun og uppbyggingu,“ skrifar hann.

Lausnin sé góð fyrir bæði Danmörku, Grænland, Bandaríkin og alla bandamenn landanna. Þau hlakki jafnframt til að vinna með „hinu dásamlega fólki í Danmörku og á Grænlandi“ og muni gæta landsvæðisins sem byggt og starfað verði á af mikilli alúð.

Þá hefur danska forsætisráðuneytið staðfest að útlit sé fyrir að samningur milli ríkjanna verði undirritaður í næstu viku, er fram kemur í fréttavakt Berlingske. Þar er vitnað í fréttatilkynningu frá ráðuneytinu um að gert sé ráð fyrir að samningurinn styrki öryggi á norðurslóðum og Norður-Atlantshafssvæðinu.

Sé öllum til hagsbóta

„Gert er ráð fyrir að ríkisstjórnirnar þrjár undirriti samninginn í næstu viku í tengslum við allsherjarþing Sameinuðu þjóðanna. Þegar samningurinn hefur verið undirritaður þarf hann að fara í gegnum nauðsynlega þingmeðferð til að öðlast gildi,“ sé einnig meðal þess sem greint sé frá í fréttatilkynningunni.

Þá er einnig haft eftir formanni landsstjórnar Grænlands, Jens-Frederik Nielsen, að „það sé ánægjulegt að við séum að ganga frá samningi sem tryggir og styrkir öryggi Grænlands, Danmerkur, Bandaríkjanna og vestræna bandalagsins“ og að samningurinn viðurkenni hagsmuni Grænlands og stöðu okkar í alþjóðlegu samstarfi. Það sé okkur öllum til hagsbóta.

Mette Frederiksen forsætisráðherra Danmerkur hafi einnig tjáð sig um málið en hún hafi sagst sátt við að það væri útlit fyrir góðan samning fyrir Grænland, danska konungsríkið og Bandaríkin.

„Samningur sem styrkir sameiginlegt öryggi okkar á norðurslóðum og Norður-Atlantshafssvæðinu og er þar með einnig góður fyrir NATO og Evrópu. Og samningur sem um leið viðurkennir fullveldi og landhelgi konungsríkisins og sjálfsákvörðunarrétt grænlensku þjóðarinnar.“

Fréttin hefur verið uppfærð.