33 mörk í tveimur leikjum: Mætti á æfingar og leiki með pabba

Gunnar er fæddur árið 2008 og sonur Róberts Gunnarssonar, fyrrum landsliðsmanns í handbolta og aðstoðarþjálfara Vals í dag. Hann hefur því fylgt föður sínum eftir lengi vel í gegnum hans atvinnumannaferil. Við hittum Gunnar á Hlíðarenda á dögunum.

„Ég var ekkert meira að æfa en vanalega í sumar. Var bara duglegur að æfa og lyfta en gerði ekkert sérstakt sko,“ segir Gunnar Róbertsson í samtali við Vísi.

Gunnar var í nokkuð stóru hlutverki með Valsliðinu sem fór alla leið á síðasta tímabili en eftir tímabilið lögðu reynsluboltar liðsins skóna á hilluna og það var ljóst að hans hlutverk yrði enn stærra.

„Það má segja að margir góðir séu farnir en svo eru líka nokkrir nýir góðir komnir þannig að kannski er reynslan aðeins minni en þetta er fínn hópur og bara lítur vel út.“

En að skora 33 mörk í tveimur handboltaleikjum er magnað afrek. En Gunnar hugsar lítið út í það.

„Ég pæli ekkert mikið í þessu. Ég reyni bara að mæta og taka mína sénsa og þegar boltinn fer inn þá er þetta bara extra sætt.“

Eins og áður segir er faðir Gunnars Róbert Gunnarsson sem var landsliðsmaður og atvinnumaður í handbolta í mörg ár. Gunnar hefur því búið með fjölskyldunni út um alla Evrópu.

Ekkert heyrt frá liðum erlendis frá

„Maður mætti á alla leiki og alltaf þegar maður gat á æfingar með honum, ef það var ekki skóli þá mætti maður bara með honum. Það var mjög gaman. Það hefur alltaf verið draumurinn minn að verða handboltamaður og ég stefni bara á að komast eins langt og ég mögulega get, hvar það verður eða hvaða landi eða hvaða liði, það á bara eftir að koma í ljós.“

Hann segist ekki vita af áhuga frá neinum liðum erlendis frá eins og staðan er í dag en Vísir hefur heimildir fyrir því að hann sé nú þegar búinn að vekja mikla athygli í stórum deildum í Evrópu.

„Það er ekkert talað við mig. Ég mæti bara á æfingar og leiki og reyni að gera mitt besta sko og sé bara hvað gerist eftir það.“

Hér að ofan má sjá viðtalið við Gunnar.