Svo slakir að stuðnings­menn tóku púlsinn

Atlanta er talið meðal allra verri liða deildarinnar og hafa hreint ekki byrjað leiktíðina vel. Fálkarnir létu Packers hins vegar líta býsna illa út í nótt þar sem stjörnuleikmennirnir; hlauparinn Bijan Robinson og útherjinn Drake London sýndu allar sínar bestu hliðar.

Stuðningsmenn Packers hafa fengið býsna góðu að venjast síðustu ár og áratugi þar sem liðið hefur yfirleitt verið í fremstu röð.

Það virðist hreint ekki staðan í ár þar sem slakt Atlanta-lið vann 35-14 sigur í nótt, og það í Green Bay í Wisconsin.

Kennarinn Valur Gunnarsson, sem er reglulega sérfræðingur í hlaðvarpinu Tíu Jardarnir, kjarnaði tilfinningar Green Bay stuðningsmanna ágætlega á samfélagsmiðlinum X:

„Jæja. Kominn tími á NFL twitt. Þetta er lélegasta og leiðinlegasta Packers lið sem ég man eftir. Ég hata allt við það. Lifið heil,“ sagði Valur á X-inu.

NFL-deildin heldur áfram um helgina á Sýn Sport.

Klukkan 17:00 á sunnudag er leikur Jacksonville Jaguars við New England Patriots á Sýn Sport og á sama tíma byrjar hið fræga Red Zone á Sýn Sport 3.

Leikur San Francisco 49ers og Arizona Cardinals er þá klukkan 20:20 á Sýn Sport á sunnudag.