Neituðu sök við þing­festingu Straumsvíkur­málsins

Af karlmönnunum níu eru sex erlendir ríkisborgarar og þrír Íslendingar. Einn ákærðra, Arthur De Araujo Faria, mætti fyrir dómara en hinir átta tóku þátt í gegnum fjarfundarbúnað.

Sjö þeirra dvelja á Hólmsheiði og voru samankomnir í gegnum fjarfundarbúnað. Lúther Ólason var hins vegar einn á Hólmsheiði. Vegna vandræða með hljóðið taldi dómarinn það gilt að Lúther myndi setja þumalinn upp eða niður sem svar. 

Arthur, Vasile Costache, Corneliu Radulesco, Eziquiel De Lima Pereira og Wagner Alexander De Silva eru ákærðir fyrir skipulagða brotastarfsemi og stórfellt fíkniefnalagabrot með því að sammælast um að flytja fíkninefnin inn. 

Sjötti erlendi ríkisborgarinn er ákærður fyrir hlutdeild í broti mannanna. Hann á að hafa flutt inn kafarabúning sem var notaður til að ná fíkniefnunum úr sjókistu sem þeim hafði verið komið fyrir í.

Fjórir þeirra töluðu portúgölsku en tveir þeirra eru frá Rúmeníu og töluðu rúmensku.

Lúther Ólason og Lárus Freyr Einarsson eru ákærðir fyrir tilraun til fíkniefnalagabrots með því að hafa reynt að taka á móti efnunum. Atli Freyr Fjölnisson er einnig ákærður fyrir að hafa gefið þeim Lútheri og Lárusi fyrirmæli um mótttöku fíkniefnanna.

Aðalmeðferð málsins verður í byrjun desember.