„Það er ekkert högg, það er bara að rísa“

„Já, ætli ég flokki þetta ekki bara bara undir sorg. Leikmennirnir mínir eru auðvitað sorgmæddir og ég finn alveg fyrir sorginni,“ sagði Matthías Guðmundsson, þjálfari Vals, eftir leikinn.

Valur hóf fyrir tveimur tímabilum ákveðna vegferð þar sem liðið var yngt upp og nokkrir eldri og reynslumeiri leikmenn hurfu á braut. Aðspurður hvort endurskoða hefði þurft stefnuna sagði hann svo ekki vera.

„Nei, nei. Þetta er stefnan sem við fórum í. Það gleymist kannski aðeins og kemur ekki nógu oft fram að við urðum náttúrulega aðeins yngri en við ætluðum okkur þar sem tvær urðu óléttar. En samt sem áður keyrðum við á þetta og við erum mjög stolt af stelpunum fyrir þetta tímabil.

Í mínum huga eru tveir leikir sem fóru illa. Við erum að falla með 24 stig og það er pottþétt met, er ég alveg viss um.“

Hversu stórt högg er þetta fyrir kvennaboltann í Val?

„Það er ekkert högg, það er bara að rísa. Ég stend hérna fyrir framan ykkur og tel mig hafa átt góðan fótboltaferil hjá mínu ástkæra félagi. Ég féll þrisvar sinnum með þeim og fór þrisvar sinnum með þeim upp. Svo hófst bara upprisan og ég hef unnið líka alla titla sem eru í boði á Íslandi“

„Allir leikmenn vita auðvitað hvað er í húfi í hverjum leik. Þær gáfu allt í þetta í dag, nákvæmlega það sem við vildum, og það skilaði sigri. Við stóðum við okkar. Ég get ekki stjórnað hvað gerðist hinum megin.“

Matthías á eitt ár eftir af sínum samningi hjá Val og hefur áhuga á að halda áfram með liðið í næstefstu deild.

„Ég er með samning í eitt ár í viðbót og hef áhuga á að vera áfram hjá Val, klárlega,“ sagði Matthías að lokum.