Opna seinna á Dalvegi og í Jafnaseli

Yfir vetrarmánuðina, frá og með 16. ágúst til og með 15. maí, verða stöðvarnar opnar frá klukkan 12:00 til 18:30 en yfir sumarið, frá og með 16. maí til og með 15. ágúst, verða stöðvarnar opnar lengur, eða frá 09:00 til 19:00.

„Með þessu næst fram hagræði í rekstri stöðvanna, sem gerir SORPU kleift að þjónusta viðskiptavini enn betur á þeim stöðvum þar sem aðsóknin er mest og mestur úrgangur berst,“ segir í tilkynningu frá Sorpu.

Skilgreindar sem litlar stöðvar

Þar kemur fram að í mars á þessu ári voru stöðvarnar tvær skilgreindar sem litlar endurvinnslustöðvar. Með því að gera það hafi Sorpa getað aukið öryggi, bætt flæði og leiðbeint viðskiptavinum með stærri og þyngri efnisflokka á stórar stöðvar, sérstaklega stöðvarnar við Breiðhellu og Sævarhöfða, nú Lambhagaveg.

„Reynslan af rekstri litlu stöðvanna tveggja er góð. Biðtími á þeim er styttri og auðveldara en áður fyrir viðskiptavini að athafna sig þegar þeir losa sig við minni úrgang. Viðskiptavinir sem ekki eru í framkvæmdum hafa margir tekið breytingunum fagnandi og upplifa sig öruggari og velkomnari á stöðvunum en áður,“ segir í tilkynningunni og að frá þessum tíma hafi móttekið magn á stöðvunum dregist saman um 60 prósent og heimsóknum fækkað. Því hafi verið ákveðið að breyta opnunartíma.