Bláa lónið má kaupa annan ferðaþjónusturisa

Í fréttatilkynningu þess efnis segir að greint hafi verið frá kaupunum í júní 2026. Þá hafi komið fram að þau væru háð fyrirvörum um áreiðanleikakönnun beggja félaga ásamt samþykki hluthafafunda og svo Samkeppniseftirlitsins. Fyrri tveimur fyrirvörunum hafi þegar verið aflétt. Markmiðin með kaupunum séu að tryggja að Bláa lónið leiði áfram uppbyggingu og fjárfestingar sem staðsetja Ísland sem einn af fremstu upplifunar- og vellíðunar áfangastöðum heims.

Spennandi tímar framundan

„Það eru spennandi tímar framundan. Við förum inn í Bláa Lóns samstæðuna með öfluga starfsemi víða um land, mikla sérþekkingu, sterka sölu- og rekstrarmenningu og síðast en ekki síst framúrskarandi starfsfólk. Með því að sameina ólíka styrkleika fyrirtækjanna skapast ný tækifæri til að þróa þjónustu og upplifanir, ná til fleiri gesta og styrkja stöðu Íslands sem áfangastaðar,“ er haft eftir Ásgeiri Baldurs, forstjóra Arctic Adventures.

Með kaupunum verði til ein stærsta samstæða í íslenskri ferðaþjónustu. Samanlögð velta félaganna hafi numið um 34,3 milljörðum króna árið 2025 og fjöldi stöðugilda sé um 1.100.

„Við erum með skýra sýn á hvernig við viljum vaxa á næstu árum: með því að efla kjarnastarfsemina, með þróunarverkefnum víða um land og með ytri vexti. Samruninn við Arctic Adventures er hluti af þeirri vegferð. Vörumerki félagsins fá áfram að dafna og við hlökkum til að vinna með starfsfólkinu,“ er haft eftir Sigríði Margréti Oddsdóttur, forstjóra Bláa lónsins.

Stefna á markað í mánuðinum

Loks segir í tilkynningu að Bláa lónið vinni nú að undirbúningi skráningar félagsins á aðalmarkað Nasdaq Iceland í þessum mánuði. Fyrirtækjaráðgjöf Landsbankans og Fossar fjárfestingarbanki hafi umsjón með fyrirhuguðu hlutafjárútboði. 

Fyrirtækjaráðgjöf Landsbankans hafi einnig veitt Bláa lóninu ráðgjöf við kaup á Arctic Adventures.