Matthews úr leik | Áfall fyrir Portland

Skotbakvörðurinn Wesley Matthews leikur ekki meira með Portland Trail Blazers á leiktíðinni en hann sleit hásin í leik gegn Dallas Mavericks í nótt.

Matthews var á leið í hraðaupphlaup þegar hann féll niður, en þá voru tvær mínútur liðnar af seinni hálfleik. Í myndatöku eftir leikinn kom svo í ljós að hásinin hafði slitnað.

Þetta er mikið áfall fyrir Portland en Matthews er einn af lykilmönnum liðsins. Hann skoraði 16,1 stig, tók 3,7 fráköst og gaf 2,3 stoðsendingar að meðaltali í þeim 60 leikjum sem hann spilaði í vetur.

Portland vann leikinn gegn Dallas með 94 stigum gegn 75.

Portland er í 3. sæti Vesturdeildarinnar en liðið hefur unnið 41 leik í vetur og tapað 19.