Dempsey tryggði Bandaríkin áfram og sigur í riðlinum | Sjáðu mörkin

Bandaríkin tryggðu sér sæti í 8-liða úrslitum Copa América, Suður-Ameríkukeppninnar, og sigur í A-riðli með 1-0 sigri á Paragvæ á Lincoln Financial Field í Philadelphia.

Clint Dempsey skoraði eina mark leiksins á 27. mínútu með skoti úr teignum eftir sendingu frá Gyasi Zardes.

Staðan var 1-0 í hálfleik en strax á þriðju mínútu í seinni hálfleik fékk DeAndre Yedlin sitt annað gula spjald á örskömmum tíma og þar með rautt og Bandaríkjamenn því einum færri.

Það kom þó ekki að sök. Bandaríkjamenn spiluðu sterkan varnarleik með John Brooks sem besta mann og Paragvæar ógnuðu sjaldan. Brad Guzan varði í tvígang frá Jorge Benítez og Miguel Almiron þegar átta mínútur voru til leiksloka en annars átti hann nokkuð náðugan dag í marki bandaríska liðsins.

Sigurinn tryggði Bandaríkjamönnum ekki einungis sæti í 8-liða úrslitum heldur einnig sigur í riðlinum þar sem Kólumbía tapaði 3-2 fyrir Kosta Ríku í Houston.

Kólumbíumenn voru öruggir áfram fyrir leikinn og hvíldu nær alla lykilmenn sína í nótt. Og það gæti reynst þeim dýrkeypt því þeirra bíður nú væntanlega leikur gegn Brasilíu í 8-liða úrslitum.

Johan Venegas kom Kosta Ríku yfir strax á 2. mínútu með frábæru skoti eftir skyndisókn en Frank Fabra jafnaði metin aðeins fjórum mínútum síðar. Fabra var aftur á ferðinni á 34. mínútu þegar hann skoraði sjálfsmark og kom Kosta Ríku yfir.

Celso Borges kom Kosta Ríku-mönnum svo í 3-1 þegar hann rak smiðshöggið á laglega sókn á 58. mínútu. Marlos Moreno Duran minnkaði muninn í 3-2 á 73. mínútu en nær komust Kólumbíumenn ekki. Lokatölur 3-2, Kosta Ríku í vil.