Alríkislögreglan grípur til varna

Forsvarsmenn og starfsmenn Alríkislögreglu Bandaríkjanna, FBI, hafa gripið til varna gegn aðgerðum Donald Trump, forseta, og bandamanna hans í fjölmiðlum og á þingi til að grafa undan trúverðugleika stofnunarinnar og Dómsmálaráðuneytisins í því skyni að verja forsetann gegn Rússarannsókninni svokölluðu.

FBI sendi út yfirlýsingu í gær þar sem umdeilt minnisblað þingmanna Repúblikanaflokksins var gagnrýnt og væntanleg opinber birting þess fordæmd á þeim grundvelli að það gefi ekki rétta mynd af stöðu mála.

Svo virðist sem að deilur Trump-liða við stjórnendur FBI og aðila innan ráðuneytisins, sem að hafa hingað til að mestu farið fram á bak við luktar dyr séu nú komnar í dagsljósið.

Christopher Wray, yfirmaður FBI sem skipaður var af Trump, eftir að hann rak James Comey úr starfi, hafði varað Hvíta húsið við því að birta minnisblaðið á fundi í Hvíta húsinu. Nú hefur hann hins vegar einnig gert það opinberlega.

Sjá einnig: Aðgerðum Repúblikana líkt við alræmt augnablik Watergate-hneykslisins

Trump hefur á undanförnum mánuðum gengið hart fram gegn Dómsmálaráðuneytinu og FBI og gagnrýnt báðar stofnanir, sem og eigin dómsmálaráðherra, harðlega. Wray hefur þó sloppið við alla gagnrýni, en það gæti breyst í kjölfar yfirlýsingar FBI.

Fyrrverandi starfsmenn FBI segja Politco að yfirlýsing stofnunarinnar sé viðvörunarskot til Trump og bandamanna hans sem hafa gagnrýnt FBI hvað harðast.

Fregnir hafa borist af spennu á milli Trump og Wray eftir að Trump fór fram á að Wray myndi reka næstráðanda sinn, Andrew McCabe, aðstoðarforstjóra FBI. Wray mun hafa neitað og hótað að segja af sér.

Þá hafa einnig borist fregnir af því að Donald Trump vilji víkja Rod Rosenstein, aðstoðardómsmálaráðherra Bandaríkjanna, sem heldur utan um Rússarannsóknina svokölluðu og skipaði Robert Mueller, sérstakan saksóknara, í embætti, úr starfi sínu.

Áðurnefnt minnisblað var skrifað af starfsmönnum Devin Nunes, formanni þingnefndar fulltrúadeildar Bandaríkjaþings um njósnamál. Þar eru Alríkislögreglan og Dómsmálaráðuneyti Bandaríkjanna harðlega gagnrýnd og því er haldið fram að FBI hafi beitt ólöglegum aðferðum til að öðlast hlerunarheimildir gagnvart starfsmönnum framboðs Trump.

Trump hefur fimm daga, frá því að þingnefndin samþykkir að opinbera blaðið, til þess að taka ákvörðun. Þingnefndin kaus um að opinbera blaðið á mánudaginn. Sjálfur heyrðist Donald Trump segja á þriðjudagskvöldið að hann væri „hundrað prósent“ tilbúinn til að samþykkja birtingu minnisblaðsins umdeilda. Sérfræðingar ytra búast jafnvel við því að minnisblaðið verði opinberað í dag.

Segja gögn sérvalin

Demókratar hafa einnig mótmælt birtingunni harðlega. Þeir segja að minnisblaðið dragi upp ákaflega misvísandi mynd af hvernig FBI og dómsmálaráðuneytið hafa hagað störfum sínum í tengslum við rannsóknina. Þannig sérvelji Nunes gögn til að styðja kenningu sína um hlutdrægni FBI en líti fram hjá öðrum gögnum sem rannsóknin hefur byggt á.

Þrátt fyrir ákall Repúblikana um að minnisblaði verði opinberað virðast þingmenn flokksins í njósnanefndinni ekki tilbúnir til að standa með því sem þar er haldið fram. Blaðamenn Lawfare hringdu á dögunum í þá alla og einungis tveir af tólf sögðust tilbúnir að standa með minnisblaðinu.



Sjá einnig: Árásum íhaldsmanna á FBI fjölgar



Adam Schiff, þingmaður Demókrataflokksins og varaformaður njósnanefndarinnar, heldur því fram að minnisblaðinu hafi verið breytt, eftir að Repúblikanar í nefndinni greiddu atkvæði um að opinbera það og áður en það var sent til Hvíta hússins. Því hafi núverandi útgáfa minnisblaðsins ekki verið samþykkt til opinberunar.

Hann fer fram á að þingnefndin kjósi aftur um að opinbera minnisblaðið á fundi á mánudaginn.

BREAKING: Discovered late tonight that Chairman Nunes made material changes to the memo he sent to White House – changes not approved by the Committee. White House therefore reviewing a document the Committee has not approved for release. pic.twitter.com/llhQK9L7l6

— Adam Schiff (@RepAdamSchiff) February 1, 2018

Talsmaður meirihlutans í nefndinni gefur lítið fyrir athugasemd Schiff og segir smávægilegar breytingar hafa verið gerðar til að laga málfræðivillur og tvö atriði sem forsvarsmenn FBI og minnihluti nefndarinnar hafi bent á.

Sérfræðingar sem Washington Post ræddi við segja að það gæti reynst forsvarsmönnum FBI erfitt að svara minnisblaðinu og mögulegum rangfærslum þar. Gagnrýni gegn blaðinu hefur að miklu leyti snúið að því að sleppt sé að minnast á mikilvægar upplýsingar. Því gæti það reynst FBI erfitt að svara fyrir sig þar sem upplýsingarnar sem um ræðir eru leynilegar.

Eftir að Wray fékk að skoða minnisblaðið á sunnudaginn fór hann fram á við njósnanefndina að mæta á fund hennar og útskýra fyrir þingmönnunum af hverju hann vildi ekki að það yrði gert opinbert. Þeirri beiðni var hins vegar hafnað af meirihluta nefndarinnar.

Þar að auki neitaði meirihluti nefndarinnar að opinbera einnig minnisblað sem Demókratar í nefndinni skrifuðu sem svar við minnisblaði Repúblikana.