Verð á hráolíu lækkar

Verð á hráolíu lækkaði í fyrradag og hefur því ekki verið lægra í tvo mánuði. Ástæðu þessarar lækkunar má væntanlega rekja til aukins útflutnings á olíu frá Írak og Noregi. Verkfall norskra olíuverkamanna lauk á föstudaginn og á laugardaginn var lokið við viðgerð á olíuleiðslu í Írak sem hafði orðið fyrir skemmdarverkum. Einnig bar það til tíðinda að Írak endurheimti fullveldi sitt í fyrradag eftir fimmtán mánaða hernám og hefur því útflutningur um Persaflóann hafist að nýju. Á fundi sem haldinn var í Beirut 3. júní síðastliðinn ákváðu OPEC ríkin að auka olíuframboð sitt um tvær milljónir tunna á dag þann 1. júlí næstkomandi. Þá myndi framboðið fara úr 23,3 milljónum tunna í 25, 5 milljónir tunna og síðan myndi framboðið aukast aftur um 500 þúsund tunnur á dag í ágúst. Einnig kom fram á þessum fundi að samtökin myndu framleiða meiri olíu til að lækka verð en verð á olíu lækkaði um 3,7 prósent í seinustu viku sem er mesta lækkunin á einni viku í þrjá mánuði. Olíuverð hefur lækkað um þrettán prósent frá 1. júní en þá var það í hámarki. Nú er olíuútflutningur frá Noregi kominn í eðlilegt horf og OPEC ríkin eru að auka framboð sitt þannig að búist er við því að framboð á olíu sé nægilegt til að mæta vaxandi eftirspurn.