Hnífjafnt hjá Bush og Kerry

George W. Bush Bandaríkjaforseti og öldungadeildarþingmaðurinn John Kerry njóta jafn mikils fylgis samkvæmt nýrri skoðanakönnun Gallups fyrir sjónvarpsstöðina CNN og dagblaðið USA Today. Hvor um sig nýtur 49 prósenta fylgis meðal líklegra kjósenda. Bush hefur naumt forskot, 49 prósenta fylgi gegn 47 prósenta fylgi Kerrys meðal þeirra sem eru á kjörskrá. Gallup könnunin er önnur könnunin í röð sem sýnir að Kerry hafi tekist að vinna upp forskot á Bush, áður hafði könnun Newsweek sýnt að hann nyti meira fylgis en forsetinn.