Sonur minn bjargaði mér frá jakka

Ármann Guðmundsson, leikstjóri og leikskáld, reynir að kaupa sér sem minnst en gerði einu sinni glappaskot í innkaupum. "Ég keypti mér rúskinnsleðurjakka áður en ég útskrifaðist úr menntaskóla fyrir fjórtán árum. Þáverandi kærasta lagði hart að mér að kaupa jakkann og ég lét undan þrátt fyrir nagandi efasemdirnar sem ég fann fyrir. Hann leit svo sem ágætlega út en ég fílaði hann aldrei neitt sérstaklega og einkum voru það axlapúðarnir sem fóru í taugarnar á mér. Svo passaði hann ekkert á mig því ég var svo mikil horrengla að jakkinn flaksaðist bara á mér. Hann kostaði 20.000 krónur sem var mikill peningur í þá daga og miklu meira en við höfðum efni á. Svo bjargaði sonur minn mér frá þessum jakka með því að gubba á hann einu sinni þegar hann var búinn að drekka úr pelanum sínum. Til stóð að fara með jakkann í hreinsun en það varð einhvern veginn aldrei af því, ég veit ekki af hverju. Ég var með nett samviskubit í nokkur ár yfir því að ganga ekki í flík sem við höfðum eytt í peningum sem við áttum í raun ekki en ekki gat ég gengið í útgubbuðum jakkanum." Skyldi jakkinn vera til ennþá? "Ég gróf hann upp um daginn en held að ég muni nú ekki fara að ganga í honum. Gubbið er reyndar þornað og gufað upp en það er eitthvað við axlapúðana. Það er samt merkilegt að jakkinn sé ennþá til því ég hef flutt nokkrum sinnum síðan þetta var og alltaf hefur samviskubitið forðað mér frá því að henda honum. En nú ætla ég að fara með hann niður í leikfélag og láta hann ganga aftur. Ég vona bara að hann komi einhverjum ódauðlegum persónum til góða. Kannski skrifa ég bara mann inn í hann," segir Ármann hugsi og hver veit nema jakkinn öðlist einhvern tíma nýtt líf.