Tveggja milljarða hagnaður

Sparisjóður Reykjavíkur og nágrennis (SPRON) skilaði 2.247 milljóna króna hagnaði á fyrstu þremur ársfjórðungunum sem er metafkoma. Hagnaðurinn á tímabilinu jókst um fimm prósent ef miðað er við sama tímabil í fyrra.

Arðsemi eigin fjár var yfir 50 prósent. Heildareignir SPRON eru komnar yfir eitt hundrað milljarða króna og hafa aukist um helming frá áramótum. Eigið fé er um níu milljarðar króna. SPRON ætlar að styrkja efnahag sinn enn frekar með því að tvöfalda stofnfé sitt á næstunni.