Legudeild fyrir flensusjúklinga

 Guðlaug Rakel Guðjónsdóttir sviðsstjóri á lyflækningasviði sagði, að opnuð hefði verið sérstök legudeild fyrir þetta fólk á Hringbraut og yrði hún væntanlega opin fram eftir vikunni eða svo lengi sem þyrfti. "Þessi deild er skráð fyrir 13 sjúklinga," sagði Guðlaug Rakel. "Þá bættum við einnig við rúmum í gæsludeildinni í Fossvoginum. Það hafa verið óvenjulega mikil veikindi. Það hafa verið miklar innlagnir bæði í gegnum bráðamóttökuna og hjartadeildina á Hringbraut. Fólk sem er veikt fyrir þolir illa að fá umgangspestir. Þetta leggst allt hvað á annað, en flensan toppar það alveg." Guðlaug Rakel sagði enn fremur að í gær hefðu verið 35 sjúklingar á spítalanum umfram það sem væri á venjulegum degi. Starfsfólk hefði á tilfinningunni að mesti kúfurinn væri að fara af þeim fjölda sem þyrfti innlögn vegna flensusjúkdóma.