Vilja franskt nafn á þættina

Idol-stjörnuleit heldur væntanlega áfram í franska sjónvarpinu en fjöldi skyldra þátta gæti horfið. Ástæða þessa eru nöfnin sem mörg hver eru ensk og það líkar allsherjarútvarpsráði fransmanna ekki. Ráðið, sem hefur einnig vald yfir dagskrá einkastöðva, krefst þess að þættir á borð við Popstar beri framvegis franskt nafn og heiti þá Vedettes de varietes til að mynda. Verði sjónvarpsstöðvar í Frakklandi ekki við tilmælunum má ráðið afturkalla útsendingarleyfi þeirra.