Birgðir af strimlum uppi í skáp

Eins og fram kom í blaðinu í gær jókst kostnaður stofnunarinnar vegna blóðstrimla um 50 milljónir króna á tíu mánaða tímabili milli áranna 2003 og 2004. Þuríður sagði að eldri reglugerð Tryggingastofnunar hefði verið gölluð og í raun boðið upp á ofnotkun af þessu tagi. Þessi tæki væru ekki ókeypis frekar en annað. Það væru skattborgararnir sem borguðu brúsann þegar upp væri staðið. Ýmsir vankantar væru á gildandi reglugerð, þrátt fyrir þær breytingar sem gerðar hefðu verið á henni. Væri unnið að því að sníða þá af. Þuríður sagði að þeir sem greinst hefðu með sykursýki en væru á mataræðismeðferðum þyrftu ekki að mæla sig. Í breyttri reglugerð hefði TR lækkað endurgreiðslur vegna strimlanna um 15 prósent til að stemma stigu við ofnotkuninni. Það þýddi aftur á móti að sá sykursjúki væri farinn að greiða 1.100 krónum meira fyrir þriggja mánaða birgðir heldur en áður. Til viðbótar kæmi svo annar kostnaður vegna þessa flókna og erfiða sjúkdóms.