Dregur úr nýsmiti HIV hérlendis

Aðeins fimm manns greindust með nýsmit af völdum HIV-veirunnar árið 2004 og eru það fæstu tilfelli sem greinst hafa á einu ári síðustu fimmtán árin. Fyrstu þrjá mánuði þessa árs hefur verið tilkynnt um tvö tilfelli af smiti hér á landi sem er einnig óvenju lítið. Því bendir ýmislegt til að raunverulega sé að draga úr HIV-smiti hér á landi. Þetta kemur fram í nýútkomnum Farsóttarfréttum sem gefnar eru út af Landlæknisembættinu og birtast á vefnum www.landlaeknir.is. Umfangsmesta vöktun HIV-smits fer fram meðal blóðgjafa í Blóðbankanum en þar eru um það bil 2.000 nýir blóðgjafar rannsakaðir á hverju ári. Því má þakka árvekni lækna gagnvart HIV-smiti þennan góða árangur. Í árslok 2004 höfðu 176 tilfelli af HIV-sýkingu verið tilkynnt til sóttvarnarlæknis frá upphafi skráningar hér á landi. Þar af höfðu 56 sjúklingar greinst með alnæmi og 36 látist af völdum sjúkdómsins. Langt er frá því að alnæmisfaraldurinn sé í rénun á heimsvísu og jafnvel hjá nágrannaþjóðum okkar eru teikn á lofti um að HIV-smit sé aftur farið að breiðast út meðal áhættuhópa. Því er áríðandi að Íslendingar haldi vöku sinni og varðveiti þann góða árangur sem náðst hefur í að hefta útbreiðslu HIV-smits hér á landi.