Slökktu tvo elda í morgun

Allt tiltækt slökkvilið höfuðborgarsvæðisins var kallað út um klukkan hálfsjö í morgun vegna bruna í atvinnuhúsnæði við Fiskislóð í Reykjavík. Einnig þurfti að slökkva eld við Melabúðina á þriðja tímanum í nótt. Þegar slökkviliðið kom á staðinn við Fiskislóð 45 leit út fyrir að um stórbruna væri að ræða. Þykkan, svartan reyk lagði frá húsinu og út um þakskeggið og vegfarandinn sem hringdi í neyðarlínuna kvaðst hafa heyrt sprengingar innan úr húsnæðinu. Engin starfsemi er í húsnæðinu eins og er, það er bara einn geimur að hluta til á tveimur hæðum og það gerði það að verkum að reykkafararnir þurftu að æða inn í mökkinn í leit að eldinum og eldsmatnum. Björn Björnsson, stöðvarstjóri hjá slökkviliðinu, sagði aðspurður að eldur hefði logað í bíl innst inni í húsinu en ekki væri ljóst hvernig kviknað hefði í honum. Aðspurður um tjónið sagði Björn það gríðarlegt, aðallega vegna reyks. Eigandi hússins er fyrirtækið Fiskislóð ehf. Það keypti húsnæðið um áramót og hefur verið að breyta því í verslunar- og þjónustuhúsnæði. Björn Einarsson, einn eigenda hússins, segir að til hafi staðið að skipta húsinu upp í minni brunahólf en verið væri að samþykkja teikningar þar að lútandi. Spurður um tjónið sagðist Björn ekki vita mikið um það þar sem hann hefði ekki getað farið inn í húsið vegna reyksins. Aðspurður hvort hann væri vel tryggður sagðist hann reikna með því að tryggingar væru í lagi. Og slökkviliðið þurfti að sinna fleiru í nótt, því það var kallað út að Melabúðinni í Reykjavík á þriðja tímanum. Þar logaði eldur í kassageymslu, en ekki er innangengt í verslunina úr henni. Vel gekk að slökkva eldinn, en nokkur reykur barst með lögnum inn í verslunina. Starfsfólk þreif og ræsti það allt saman í morgun og var verslunin opnuð á hádegi eins og ekkert hefði í skorist. Rannsókn á eldsupptökum á báðum stöðum er í höndum rannsóknardeildar lögreglunnar í Reykjavík og að hennar sögn er ekkert hægt að segja um það enn hvernig eldarnir kviknuðu.