Segist saklaus af bókhaldsbrellum

Jón Aðalsteinn Bergsveinsson skrifar Takefumi Horie, fyrrum forstjóri japanska net- og ráðgjafafyrirtækisins Livedoor, segist saklaust af ákærum um aðild að bókhaldssvikum. Horie er meðal annars gefið að sök að hafa gefið fjármálastjóra og fleiri stjórnendum fyrirtækisins skipun um að ýkja hagnað Livedoor, sem í raun skilaði taprekstri, með það fyrir augum að hækka gengi hlutabréfa í fyrirtækinu. Réttarhöld í málinu hófust í vikunni. Þegar upp komst að verið væri að rannsaka bókhaldssvik innan fyrirtækisins í janúar síðastliðnum reyndu fjölmargir fjárfestar að losa sig við bréf í fyrirtækinu með þeim afleiðingum að tölvukerfi kauphallarinnar í Tókýó hrundi og varð að loka fyrir viðskipti í henni 20 mínútum fyrir venjulegan lokunartíma. Fyrirtækið, sem enn er starfandi, var afskráð úr kauphöllinni vegna svikanna í apríl. Þá hafði málið mikil áhrif á japönsk fyrirtæki en gengi hlutabréfa í landinu lækkaði talsvert í kjölfarið. Horie, sem stofnaði ráðgjafafyrirtækið Livin' on the Edge árið 1996 og sameinaði það hinu gjaldþrota fyrirtæki Livedoor árið 2002, var handtekinn nokkru síðar ásamt fjórum stjórnendum fyrirtækisins vegna svikanna. Þeir voru leystir úr haldi gegn tryggingu í apríl. Fjórir fyrrverandi hæstráðendur Livedoor hafa gengist við brotunum en Horie neitar einn sök og segist hneykslaður yfir ásökunum í sinn garð. Horie, sem er 33 ára, á yfir höfði sér allt að fimm ára fangelsisdóm verði hann fundinn sekur.