Norska ríkið selur í Storebrand

Folketrygdfondet, sjóður í eigu norska ríksins, er ekki lengur stærsti hluthafinn í fjármálafyrirtækinu Storebrand.

Sjóðurinn tilkynnti á dögunum um að eignarhlutur hans væri kominn undir tíu prósent af heildarhlutafé Storebrand. Salan er talin til marks um að norska ríkið muni ekki blanda sér í þann slag sem kann að myndast um yfirtöku á fyrirtækinu. Stjórnendur Storebrand hafa lýst því yfir að þeir búist við að félagið verði tekið yfir áður en langt um líður.

Þetta þýðir að Gjensidige, sem nýverið keypti stóran hlut af Orkla, hefur tyllt sér í efsta sæti yfir stærstu hluthafa Storebrand með 9,99 prósenta hlut. Norska ríkið á hins vegar 9,97 prósent. Hreiðar Már Sigurðsson, forstjóri Kaupþings, greindi frá því við vefmiðilinn e24.se í síðustu viku að bankinn ætti níu prósenta hlut í Storebrand.

Skiptar skoðanir eru meðal sérfræðinga um virði hlutabréfa í Storebrand eftir skarpar gengishækkanir bankans að undanförnu. Sérfræðingar Morgan Stanley hafa sagt að hlutabréf félagsins séu á hagstæðum kjörum og ráðleggja fjárfestum að yfirvega bréfin. Verðleggja þeir bréfin á 91 krónu hlutinn en síðasta gengi var í 80. Citigroup ráðleggur hins vegar fjárfestum hvorki að kaupa né selja.