Fimm þúsund manns hjá Sko

Símafyrirtækið Sko hefur á undanförnum mánuðum náð góðri fótfestu á íslenska símamarkaðnum. Um fimm þúsund manns eru nú í viðskiptum við félagið sem er vel umfram þau markmið sem stjórnendur félagsins settu sér í upphafi.

BTnet, sem Ódýra símafélagið tók yfir í sumar, miðar að því, líkt og Sko, að bjóða ódýrustu vöruna á markaðnum með því að veita alla þjónustu í gegnum netið. Ragnhildur Ágústsdóttir var nýlega ráðin framkvæmdastjóri Ódýra símafélagsins sem rekur bæði fyrirtækin. Hún tók þátt í uppbyggingu Sko og starfaði sem þjónustu- og vefstjóri frá stofnun þess fyrr á þessu ári.Sko hefur frá upphafi haft það að markmiði að halda ekki úti kostnaðarsömum verslunum.

Því er engar Sko-verslanir að finna vítt og breitt um landið og ekki er hægt að kaupa hleðslu í verslunum, eins og hægt er með frelsi hinna símafyrirtækjanna. Þjónusta Sko fer nefnilega að langmestu leyti fram á netinu þótt hægt sé að hafa samband við þjónustuver á annatíma, milli 12 og 18 virka daga. Þetta fyrirkomulag hefur að sögn Ragnhildar reynst vel og stendur ekki til að breyta því.

Sko skilgreinir meginmarkhóp sinn út frá ungu fólki, á bilinu 20 til 35 ára, sem er tilbúið að nota internetið og borga minna fyrir vikið. „Á netinu geta viðskiptavinir okkar skoðað nákvæmt yfirlit yfir viðskipti sín, frá því hversu oft er hringt í ákveðna manneskju til þess hve lengi er talað við hana. Þannig er hægt að sjá upp á krónu í hvað hleðslan fer. Við erum með talsvert lægra verð en samkeppnisaðilarnir og auk þess er frítt að hringja innan kerfis í alla aðra viðskiptavini Sko. Þetta er eingöngu mögulegt af því að við höfum svo litla yfirbyggingu og því mun lægri kostnað en stóru fyrirtækin.“

Ódýra símafélagið tók yfir rekstur BTnets í lok síðasta sumars og er nú í því ferli að skoða og endurskilgreina reksturinn. Markmiðið er að félagið verði ekki ósvipað Sko að uppbyggingu. Ekki stendur endilega til að bjóða þjónustu fyrirtækjanna tveggja saman í pakka. „Þetta verður ekki spurning um bindingu og fá þannig besta samninginn. Við ætlum að vera ódýrust á hverju sviði þannig að það borgi sig alltaf að vera hjá okkur, hvort sem er með GSM eða ADSL.“