Samningur Redknapp væntanlega framlengdur

Milan Mandaric stjórnarformaður úrvalsdeildarliðs Portsmouth segir að nýr samningur handa knattspyrnustjóranum Harry Redknapp sé í smíðum, hvort sem liðið falli í fyrstu deild eða haldi sér uppi í vor.

Stuðningsmenn Portsmouth tóku ráðningu Redknapp misvel, en hann hætti sem kunnugt er hjá félaginu á sínum tíma til að taka við grannaliðinu Southampton. Hann var því ekki vinsæll þegar hann var ráðinn aftur til Portsmouth, en hefur nú unnið stuðningsmennina til baka að mati Mandaric.

"Ég var vonsvikinn með viðbrögð margra stuðningsmanna þegar Harry kom aftur, en ég er ánægður með að þeir virðist nú vilja hafa hann áfram. Hann veit að í augnablikinu hugsum við nær eingöngu um hvern leik fyrir sig í fallbaráttunni, en ég reikna með að setjast niður með honum fljótlega og ræða áframhaldandi samning," sagði Mandaric.