Hatton er óhræddur

Enski hnefaleikarinn Ricky Hatton er óhræddur við þá áskorun sem hann tekst á við annað kvöld þegar hann berst við hinn örvhenta Luiz Collazo í Boston. Hatton ætlar sér sem kunnugt er stóra hluti í Bandaríkjunum og bíður færis að fá að berjast við Floyd Mayweather í framtíðinni. Bardaginn annað kvöld verður í beinni útsendingu á Sýn.

"Ég hefði alveg geta verið kyrr í Manchester og reist mér virki þar, en ég vil takast á við þá bestu. Það var enginn annar en ég sem tók þá ákvörðun að fara til Bandaríkjanna og ég er orðinn þreyttur á að heyra að ég sé að forðast ákveðna menn í bransanum. Nú er ég kominn til Bandaríkjanna til að berjast við örvhentann mann og það sýnir best hvernig maður ég er," sagði Hatton.