Lengsta kosningasjónvarp Íslandssögunnar

NFS verður með lengsta samfellda kosningasjónvarp í Íslandssögunni um helgina þegar sent verður samfleytt út í þrjátíu og fjórar klukkustundir, frá laugardagsmorgni til sunnudagskvölds.

Eins og greint hefur verið frá verður fréttastofa NFS með kosningavöku að kvöldi kjördags sem hefst strax að loknum kvöldfréttum kl. 19.10. Hún verður sýnd bæði á NFS og Stöð 2 í opinni dagskrá og sömuleiðis útvarpað á Talstöðinni. Þá verða allar tölur birtar á Vísi.is.

En fréttastöðin NFS lætur ekki þar við sitja heldur hefur kosningasjónvarpið klukkan tíu á laugardagsmorgun um leið og kjörstaðir verða opnaðir. Þórir Guðmundsson, varafréttastjóri NFS, segir að um sé að ræða lengsta kosningasjónvarp í Íslandssögunni þar sem dagskráin spanni 34 klukkutíma. Um þetta snúist NFS, að vera þar sem stórmálin séu.