Viss um að landa Fabregas

Ramon Calderon, nýkjörinn forseti Real Madrid, segist 70% viss um að geta landað miðjumanninum efnilega Cesc Fabregas frá Arsenal á næstunni. Calderon lýsti því yfir í kosningabaráttunni að hann ætlaði að koma pilti til heimalandsins á ný, en ljóst er að Arsenal verður tregt til að láta þennan frábæra knattspyrnumann renna sér úr greipum.

"Cesc er auðvitað samningsbundinn Arsenal, en ég hef verið í sambandi við hann og veit að hann vill koma til okkar. Nú þarf ég bara að setja mig í samband við Arsenal, því þeir hafa auðvitað síðasta orðið í þessu máli. Ég hef verið í sambandi við umboðsmann Cesc og hann er mjög jákvæður. Ég á bara eftir að tala við David Dein (stjórnarformann Arsenal), en hann er góður vinur minn og ég hef oft spjallað við hann. Ég er viss um að við getum náð samkomulagi í málinu og ég held að líkurnar á því að við löndum leikmanninum séu nær því að vera 70% en 50%," sagði Calderon.