Uppseldur hjá útgefanda

Nýr geisladiskur frá KK, Blús, náði Íslandsströndum um miðja síðustu viku eftir hinar undarlegustu hrakningar sem töfðu útgáfuna og framkölluðu útgáfublús. En gleðin var ekki langt undan því eftirvænting og áhugi fyrir disknum hefur ekki leynt sér og er fyrsta upplag nú uppselt hjá útgefanda. Nýtt upplag er væntanlegt til landsins á morgun.

Platan inniheldur 12 af uppáhalds blúslögum KK, lög sem hann hefur verið að syngja og spila með hljómsveitum s.l. 30 ár. Allir textarnir eru á íslensku og koma úr smiðju hins snjalla textasmiðs Braga Valdimars Skúlasonar sem hefur gert garðinn frægan með Baggalúti.

Í blúsbandinu hans KK eru Guðmundur Pétursson gítarleikari, Þorleifur Guðjónsson bassi og Friðrik Júlíusson G. trymbill. Munnharpan kemur mjög við sögu á þessari plötu, en einnig önnur blásturshljóðfæri og fer þar fremstur í flokki Sigurður Flosason saxafónleikari. Þéttir að baki honum koma Bandaríkjamennirnir Jim Hoke á saxófón og Neil Rosengarden trompetleikari, báðir frá Nashville í Tennesseefylki þar sem upptökur fóru að hluta til fram. Sigurður Guðmundsson úr Hjálmum spilar á hljómborð. Upptökustjórn var í höndum Guðm. Kristins Jónssonar, sem er þekktur sem ryþmagítarleikari Hjálma.

KK Blúsbandið mun spila í sumar á helstu útihátíðum og öðrum menningarlegum samkomum landsmanna en næsti viðkomustaður er Akureyri en þá leikur bandið, sem telur sjö manns, á Græna Hattinum, föstudaginn 4. ágúst.

www.12tonar.is

www.kk.is