Vill ná góðum úrslitum í kvöld

Steve McClaren hefur farið þess á leit við leikmenn sína að þeir nái góðum úrslitum og sýni úr hverju þeir eru gerðir í kvöld þegar liðið mætir Grikkjum í æfingaleik á Old Trafford í Manchester. Þetta er fyrsti leikur McClaren sem landsliðsþjálfara og fyrsti leikur enska liðsins síðan það var slegið úr keppni á HM í sumar. Leikurinn verður sýndur beint á Sýn klukkan 19.

"Það er mikilvægt að strákarnir gleymi vonbrigðunum í Þýskalandi í sumar, en læri þó af mistökum fortíðarinnar. Ég hef að undanförnu verið að funda með liðinu og hef leitast við að fá hverjum og einum manni í liðinu ákveðið hlutverk, þar sem hagsmunir liðsins alls eru í fyrirrúmi," sagði Steve McClaren.