Smith spilar fyrir varalið United í kvöld

Framherjinn Alan Smith mun spila með varaliði Manchester United í kvöld þegar liðið mætir Preston, en þessi 25 ára gamli leikmaður hefur ekki spilað síðan hann fótbrotnaði afar illa í leik í febrúar. Fæstir áttu von á því að Smith næði að snúa aftur á árinu, en bati hans hefur verið ótrúlegur.

"Alan hefur staðið sig frábærlega í endurhæfingunni. Hann spilaði æfingaleik fyrir luktum dyrum á miðvikudaginn og stóð sig mjög vel. Það er hreint ótrúlegt hvað hann hefur náð sér fljótt og vel af meiðslum sínum. Við reiknuðum með honum til baka í september, en hefðum í raun geta látið hann spila núna. Það er hinsvegar mikilvægt að fara varlega þegar um svo alvarleg meiðsli er að ræða og við viljum að hann verði 100% heill - en við hlökkum svo sannarlega til að fá hann aftur," sagði Ferguson.