Wenger hefur gert tilboð í Gallas

Arsene Wenger, knattspyrnustjóri Arsenal, segir að hann sé búinn að gera tilboð í franska varnarmanninn William Gallas hjá Chelsea, en segir engan botn vera kominn í mál Ashley Cole. Wenger segir jafn líklegt að hann verði áfram í herbúðum Arsenal eins og hann fari til Chelsea.

"Við erum enn í einskismannslandi varðandi Ashley Cole, en ég er búinn að gera kauptilboð í William Gallas. Mig langar umfram allt að leysa þetta mál sem fyrst, því mig langar að fara að koma mynd á leikmannahóp minn," sagði Wenger og bætti við að Chelsea hefði haft þrjá mánuði til að kaupa Ashley Cole.

Talið er að Arsenal vilji fá 25 milljónir punda fyrir Cole, en að Chelsea sé aðeins reiðubúið að greiða 20 milljónir fyrir landsliðsmanninn.