Ætlar að gefa Essien hárlokk

Ítalski framherjinn Bernardo Corradi hjá Manchester City segist ætla að gefa Michael Essien hjá Chelsea lokk úr hárinu á sér þegar liðin mætast í úrvalsdeildinni á ný eftir áramótin. Corradi var rekinn af leikvelli í sínum fyrsta leik með City í tapi gegn Chelsea og þá greip Essien í hárið á honum þegar hann gekk af velli. Ítalinn ætlar því að gefa Essien hárlokk og símanúmerið hjá rakaranum sínum þegar þeir mætast á ný.

Jose Mourinho skammaði Essien eins og hund fyrir uppátæki sitt eftir leikinn, sem Chelsea vann auðveldlega 3-0. "Ég er ekki alveg viss um af hverju Essien reif í hárið á mér," sagði Corradi í samtali við tímarit Manchester City. "Kannski finnst honum það bara svona fallegt og því hef ég ákveðið að gefa honum lokk úr hárinu á mér þegar vð spilum við Chelsea á heimavelli. Kannski læt ég hann líka hafa númerið hjá rakaranum mínum," sagði Corradi