Barcelona í vandræðum - Eiður í sviðsljósinu

Evrópu- og Spánarmeistarar Barcelona eru í bullandi vandræðum gegn Athletic Bilbao í leik sem sýndur er beint á Sýn, en meistararnir eru undir þegar flautað hefur verið til leikhlés. Eiður Smári Guðjohnsen er í byrjunarliði Barcelona og var fljótur að koma sér í sviðsljósið í leiknum.

Bilbao hefur yfir 1-0 í leiknum en fljótlega eftir að heimamenn komust yfir, var Eiður nálægt því að sleppa einn innfyrir vörn Bilbao en var felldur. Varnarmanninum var þá umsvifalaust vikið af leikvelli, en greinilegt var að hann var ekki aftasti maður og því var dómurinn í raun rangur.

Lengi leit út fyrir að Bilbao færi með forystu til búningsherberja, en þá kom aftur til kasta Eiðs Smára. Eiður átti fasta fyrirgjöf að marki Bilbao þegar komið var í uppbótartíma og þar hrökk boltinn af Carles Puyol og varnarmanni Bilbao í netið og staðan því 1-1 í hálfleik.