Man. Utd. heldur sínu striki

Manchester United heldur sínu striki í ensku úrvalsdeildinni og er nú komið með 28 stig á toppi deildarinnar eftir sannfærandi 3-0 sigur á Portsmouth á Old Trafford í dag. Liverpool sigraði Reading, 2-0, en Bolton tapaði óvænt á heimavelli fyrir Wigan.

Rétt eins og í leiknum gegn Bolton um síðustu helgi gengu leikmenn Man. Utd. frá andstæðingum sínum strax í upphafi leiks og eftir aðeins 10 mínútna leik gegn Portsmouth í dag var liðið komið með 2-0 forystu. Louis Saha skoraði úr vítaspyrnu á 4. mínútu en Cristiano Ronaldo skoraði glæsilegt mark beint úr aukaspyrnu sex mínútum síðar. Varnarmaðurinn Nemjana Visic bætti síðan við þriðja markinu í síðari hálfleik.

Eins og áður segir er Man. Utd. með 28 stig en Chelsea kemur næst með 25 stig en á leik til góða gegn Tottenham á morgun. Spútniklið Bolton missti af dýrmætu tækifæri til að halda í við stórliðin tvö en liðið er með 20 stig í 3. sæti eftir 0-1 tap á heimavelli fyrir Wigan. Það var Lee McCullogh sem skoraði mark Wigan.

Liverpool er komið upp í 7. sæti deildarinnar eftir 2-0 sigur á Reading. Það var hollenski framherjinn Dirk Kuyt sem skoraði bæði mörkin í sitthvornum hálfleiknum. Ívar Ingimarsson lék allan leikinn fyrir Reading en Brynjar Björn Gunnarsson fór af velli þegar 10 mínútur voru eftir.

Hermann Hreiðarsson lék allan tímann í vörn Charlton þegar liðið vann gríðarlega mikilvægan sigur á Mancester City á heimavelli sínum, 1-0. Sigurinn lyftir liðinu úr botnsæti deildarinnar en Hermann og félagar eru nú komnir með átta stig.

Þá vann Watford góðan sigur á Middlesbrough og fyrr í dag hafði Fulham borið sigurorð af Everton á heimavelli sínum, 1-0.