Þú ert ennþá of feitur

Brasilíski framherjinn Ronaldo er ennþá of feitur að mati þjálfara Real Madrid, Fabio Capello. Ítalski þjálfarinn segir að það verði ekki fyrr en nokkur kíló séu farin til viðbótar sem hann geti farið að gera tilkall til byrjunarliðssætis.

Ronaldo hefur ekki fengið mörg tækifæri með Real það sem af er leiktíð og lýsti því yfir í gær að hann væri orðinn mjög þreyttur á bekkjarsetunni. Capello segir Ronaldo á réttri leið en að hann megi ekki gefast upp.

"Hann leggur mjög hart að sér og er að ná viðunandi líkamsþyngd. Hann þarf samt að missa nokkur kíló í viðbót. Þetta er mjög einfalt - ef að leikmaður er ekki í formi þá mun hann ekki spila. Hann kannski horfir í spegil og er sáttur við það sem hann sér en ég sé hann daglega á æfingum og veit hvar hann stendur. Ronaldo mun spila en hann þarf að komast í betra form," sagði Capello hreinskilinn við spænska blaðamenn.