Lýsir yfir stuðningi við Roeder

Stjórnarformaður Newcastle segir að Glenn Roeder knattspyrnustjóri hafi fullan stuðning stjórnarinnar þrátt fyrir afleitt gengi liðsins það sem af er tímabils í ensku úrvalsdeildinni, en Newcastle hefur ekki unnið sigur í sjö leikjum í röð og er í næst neðsta sæti deildarinnar.

"Ég hef fulla trú á knattspyrnustjóranum og leikmönnum liðsins, en ég get ekki neitað því að ég er ósáttur við árangurinn í deildinni rétt eins og hver annar stuðningsmaður liðsins. Ég hef þó fulla trú á því að liðið muni rétta úr kútnum," sagði Shepherd, en hann átti fund með Roeder í dag.

Stuðningsmenn Newcastle eru orðnir ansi þreyttir á lélegu gengi liðsins og hrópuðu þúsundir þeirra "rekum stjórnina" í tapi á heimavelli fyrir Sheffield United um helgina.