Wenger íhugar að hvíla Henry

Arsene Wenger segir að til greina komi að framherjinn Thierry Henry verði hvíldur um helgina þegar Arsenal tekur á móti Newcastle. Wenger var ekki sáttur við að Raymond Domenech skildi ákveða að láta þá Henry og William Gallas spila allar 90 mínúturnar með franska landsliðinu í vináttuleik við Grikki í vikunni.

"Henry er búinn að spila á sunnudegi, miðvikudegi, laugardegi og svo aftur á þriðjudegi, svo álagið er mikið á honum. Ég verð því að hugsa til þess að leyfa einhverjum af þeim sem spiluðu 90 mínútur í vikunni að hvíla sig. Ég tek þá ákvörðun rétt fyrir leikinn," sagði Wenger.

Arsenal mætir Newcastle á sunnudaginn og þá á liðið erfiðan leik fyrir höndum gegn Hamburg.