Þriggja mánaða skilorðsbundið fangelsi fyrir líkamsárás

Héraðsdómur Austurlands dæmdi í dag karlmann í þriggja mánaða skilorðsbundið fangelsi fyrir að hafa ásamt félaga sínum gengið í skrokk á manni á Eskifirði í sumar. Atvikið átt sér stað fyrir utan verslun í bænum aðfararnótt sunnudagsins 11. júní en þar kýldi ákærði manninn og stappaði ofan á andliti hans þannig að maðurinn hlaut mikla áverka í andliti.

Maðurinn játaði brot sitt fyrir dómi og við ákvörðun refsingar var tekið tillit til þess ásamt því að hann var ungur og hafði ekki áður komist í kast við lögin. Á hinn bóginn var litið til þess að atlagan var hættuleg og hefði hæglega getað valdið enn alvarlegra líkamstjóni en raun varð á. Þótti þriggja mánaða fangelsi sem skilorðsbundið er til tveggja ára því hæfileg refsing.